ಚೆನ್ನ ಶಿಕ್ಷಣ ಸಿರಿ

ಶ್ರೇಷ್ಠ ವಿದ್ವಾಂಸರಾಗಿ ಸಾಹಿತ್ಯಕ್ಷೇತ್ರಕ್ಕೆ, ಕನ್ನಡ ಭಾಷಾ ಬೋಧಕರಾಗಿ ಶೈಕ್ಷಣಿಕ ಕ್ಷೇತ್ರಕ್ಕೆ ಜನಪ್ರಿಯ ಪ್ರವಚನಕಾರರಾಗಿ, ಕಥಾಕಾಲಕ್ಷೇಪ ಕಲಾವಿದರಾಗಿ ಸಾಂಸ್ಕೃತಿಕ ಕ್ಷೇತ್ರಕ್ಕೆ ಎರೇಸೀಮೆ ಚೆನ್ನಪ್ಪನವರು ಸಲ್ಲಿಸಿರುವ ಅನುಪಮ ಸೇವೆಯನ್ನು ಗುರುತಿಸಿ ಅವರನ್ನು ಯುಕ್ತರೀತಿಯಲ್ಲಿ ಸನ್ಮಾನಿಸಲು ತೀರ್ಮಾನಿಸಲಾಯಿತು. “ಉತ್ತಮ ಜನಾಂಗವನ್ನು ಕಟ್ಟಬೇಕೆನ್ನುವವರು ರಾಷ್ಟ್ರದ ಮುಂದಿನ ಪ್ರಜೆಗಳಾದ ಮಕ್ಕಳನ್ನು ಕಟ್ಟಬೇಕು. ಹೀಗೆಂದರೆ ಮಕ್ಕಳ ಭಾವಜೀವನದ ಬೆಳವಣಿಗೆಗೆ ಯೋಗ್ಯ ಸಂಸ್ಕಾರ, ಸನ್ನಿವೇಶಗಳನ್ನು ಒದಗಿಸಬೇಕು. ನಾನು ಇದನ್ನು ಅರಿತೇ ನನ್ನ ಜೀವಮಾನದ ಮುಖ್ಯವೃತ್ತಿಯಾದ ಉಪಾಧ್ಯಾಯವೃತ್ತಿಯಲ್ಲಿ ಬಹುಮಟ್ಟಿಗೆ ವಿದ್ಯಾರ್ಥಿಗಳ ಭಾವಜೀವನದ ಬೆಳವಣಿಗೆಗೆ ಏನೆಲ್ಲಾ ಮಾಡಬೇಕೋ ಅದನ್ನು ಪ್ರಾಮಾಣಿಕತೆಯಿಂದ ಮಾಡಿದ್ದೇನೆಂಬ ತೃಪ್ತಿಯಿದೆ. ಈ ವೃತ್ತಿಯಲ್ಲಿ ನನಗೆ ಯಶಸ್ಸು ಸಿಕ್ಕಿದೆಯೆಂಬ ಸಮಾಧಾನವಿದೆ. ಶಿಕ್ಷಣ ಇಲಾಖೆ ನನ್ನನ್ನು ಬಹಳ ಗೌರವಿಸಿದೆ; ಕೊನೆಗೆ ಸನ್ಮಾನ ಮಾಡಿ ಕಳಿಸಿದೆ” ಎಂದು ತಮ್ಮ ಆತ್ಮವೃತ್ತದಲ್ಲಿ (“ನನ್ನ ಕಥೆ) ಹೇಳಿರುವ ಆದರ್ಶ ಶಿಕ್ಷಕರಾದ ಶ್ರೀ ಚೆನ್ನಪ್ಪನವರಿಗೆ ಅರ್ಪಿಸುವ ಗ್ರಂಥವು ಶಿಕ್ಷಣ ತತ್ವಗಳ ವಿವೇಚನೆಯನ್ನು ಒಳಗೊಂಡಿದ್ದು ಅದು ಶಿಕ್ಷಣತತ್ವಾಭ್ಕಾಸಿಗಳಿಗೆ ಸಂದರ್ಭ ಗ್ರಂಥವಾಗಿ ಒದಗಬೇಕೆಂದು ಸಮಿತಿ ಸಂಕಲ್ಪಿಸಿತು. ಖ್ಯಾತ ಶಿಕ್ಷಣತಜ್ಞ ಪ್ರೊ. ಎಸ್‌. ಆರ್‌. ರೋಹಿಡೇಕರ್‌ ಅವರ ಅಧ್ಯಕ್ಷತೆಯಲ್ಲಿ ಶಿಕ್ಷಣಕ್ಷೇತ್ರದ ಅಪಾರ ಅನುಭವವುಳ್ಳ ಪ್ರಾಧ್ಯಾಪಕರ ಒಂದು ಸಂಪಾದಕ ಸಮಿತಿಯನ್ನು ರಚಿಸಲಾಯಿತು. ಅವರು ಸೇರಿ ಗ್ರಂಥದ ರೂಪುರೇಷೆಯನ್ನು ನಿರ್ಧರಿಸಿ, ಶಿಕ್ಷಣರಂಗದಲ್ಲಿ ಆಡಳಿತಗಾರರಾಗಿ, ವಿಷಯ ಬೋಧಕರಾಗಿ, ಕ್ಷೇತ್ರ ನಿಪುಣರಾಗಿ, ಸಂಶೋಧಕರಾಗಿ ಅನುಭವ ಪಡೆದ ತಜ್ಞರಿಗೆ ಅವರವರ ಅಧ್ಯಯನ ಹಾಗೂ ಬೋಧನೆಯ ಭಾಗವಾದ ವಿಷಯವನ್ನು ಸೂಚಿಸಿ ಲೇಖನ ಬರೆದು ಕಳಿಸಲು ಕೋರಲಾಯಿತು. ಅದರಂತೆ ಮೂವತ್ತು ಶಿಕ್ಷಣವೇತ್ತರು ಬರೆದ ಶಿಕ್ಷಣದ ವಿವಿಧ ಆಯಾಮಗಳನ್ನು ಕುರಿತ ಲೇಖನಗಳನ್ನು ವಿಷಯಾನುಸಾರವಾಗಿ ನಾಲ್ಕು ಭಾಗಗಳನ್ನು ಮಾಡಿ ಇಲ್ಲಿ ಅಳವಡಿಸಲಾಗಿದೆ. ಒಟ್ಟಾರೆ ಈ ಸಂಕಲನ ಚೆನ್ನಾದ ಶಿಕ್ಷಣತತ್ತ್ವಗಳ ಸಂಪದವಾಗಿದೆ; ಚೆನ್ನಪ್ಪನವರಿಗೆ ಅರ್ಪಿಸಿದ ಶಿಕ್ಷಣಸಿರಿಯೂ ಆಗಿದೆ. ಇಲ್ಲಿನ ಲೇಖನಗಳ ಮೌಲ್ಯವನ್ನು ಕುರಿತು ಸಂಪಾದಕ ಸಮಿತಿಯ ಅಧ್ಯಕ್ಷರು ತಮ್ಮ ಮಾತಿನಲ್ಲಿ ಪ್ರಸ್ತಾಪಿಸಿದ್ದಾರೆ.